គម្រោងលើកកម្រិតគុណភាព និងជួសជុលថែទាំកំណាត់ផ្លូវ៣ខ្សែ ក្នុងខេត្តក្រចេះជាង ៩៨​គីឡូម៉ែត្រ ត្រូវបានបើកការដ្ឋាន និងចំណាយថវិកា​ប្រមាណ៤០លានដុល្លារ
សារព័ត៌មាន SH-NEWS មានទីស្នាក់ការស្ថិតនៅតាមបណ្តោយផ្លូវលំ ក្នុងភូមិរកាកុះ សង្កាត់ព្រៃសរ ខណ្ឌដង្កោ រាជធានីភ្នំពេញ ។ "សូមអរគុណ"

គម្រោងលើកកម្រិតគុណភាព និងជួសជុលថែទាំកំណាត់ផ្លូវ៣ខ្សែ ក្នុងខេត្តក្រចេះជាង ៩៨​គីឡូម៉ែត្រ ត្រូវបានបើកការដ្ឋាន និងចំណាយថវិកា​ប្រមាណ៤០លានដុល្លារ

គម្រោងលើកកម្រិតគុណភាព និងជួសជុលថែទាំកំណាត់ផ្លូវ៣ខ្សែ ក្នុងខេត្តក្រចេះជាង ៩៨​គីឡូម៉ែត្រ ត្រូវបានបើកការដ្ឋាន និងចំណាយថវិកា​ប្រមាណ៤០លានដុល្លារ

ចេញផ្សាយ ថ្ងៃទី ០៤ ខែ មេសា ឆ្នាំ ២០២៣

AKP ក្រចេះ ថ្ងៃទី០៤ ខែមេសា ឆ្នាំ២០២៣–
គម្រោងលើកកម្រិតគុណភាព និងជួសជុលថែទាំកំណាត់ផ្លូវ៣ខ្សែ ក្នុងខេត្តក្រចេះជាង ៩៨គីឡូម៉ែត្រ រួមមាន កំណាត់ផ្លូវជាតិលេខ៧៣ ផ្លូវខេត្តលេខ៣៧៧ និងផ្លូវខេត្តលេខ​៣៧៧A ត្រូវបានប្រកាសបើកការដ្ឋាន គ្រោងចំណាយរយៈពេល១៨ខែ និងចំណាយថវិកា​ប្រមាណ៤០លានដុល្លារ ហើយរំពឹងថានឹងចូលរួមលើកកម្ពស់ការតភ្ជាប់ប្រទាក់ក្រឡា ជា​មួយ​បណ្តាញផ្លូវជាតិសំខាន់ៗ ឆ្ពោះទៅរាជធានី និងតំបន់ព្រំដែន។
គម្រោងនេះ ត្រូវបាន​ធ្វើឡើង ក្នុងពិធីប្រកាសបើកការដ្ឋានលើកកម្រិតគុណភាព និងជួសជុលថែទាំកំណាត់​ផ្លូវ​ជាតិ​លេខ៧៣ ផ្លូវខេត្តលេខ៣៧៧ និងផ្លូវខេត្តលេខ៣៧៧A នាព្រឹកថ្ងៃទី០៤ ខែមេសា ឆ្នាំ២០២៣ នៅខេត្ដក្រចេះ ដោយមានការអញ្ជើញចូលរួមពីលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និង​អធិការ​កិច្ច តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយក​រដ្ឋមន្រ្តីនៃព្រះរាជាណាចក្រកម្ពុជា ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួង​សាធារណការ និងដឹកជញ្ជូន និងលោកស្រី Maryam Salim ប្រធានគ្រប់គ្រងធនាគារ​ពិភពលោក(World Bank) ប្រចាំកម្ពុជា។

ឯកឧត្តមទេសរដ្ឋមន្រ្ដី ស៊ុន ចាន់ថុល បានគូសបញ្ជាក់ថា ការលើកកម្រិតគុណភាព និងជួសជុលថែទាំកំណាត់ផ្លូវទាំង៣ខ្សែនេះ ធ្វើឡើងដើម្បីឆ្លើយតបទៅនឹងស្ថាន​ភាពទ្រុឌ​ទ្រោម និងខូចខាតរបស់ខ្សែផ្លូវ ជាពិសេសការប្រឈមនឹងគ្រោះទឹកជំនន់ ដែលបង្កឡើង​នៅរៀងរាល់រដូវវស្សា។
ឯកឧត្ដមទេសរដ្ឋមន្រ្ដីលើកឡើងថា កំណាត់ផ្លូវទាំង៣ខ្សែនេះ ជា​ខ្សែផ្លូវ​សេដ្ឋកិច្ចដ៏មានសារៈសំខាន់ ដែលបានតភ្ជាប់ជាមួយបណ្តាញផ្លូវជាតិសំខាន់ផ្សេងៗ ឆ្ពោះ​ទៅកាន់រាជធានី និងខេត្តភាគឦសាន និងទៅកាន់ទីប្រជុំជន តំបន់សេដ្ឋកិច្ច និង​តំបន់​ព្រំដែន​របស់កម្ពុជាយើង។
ឯកឧត្ដមទេសរដ្ឋមន្រ្ដីបានឱ្យដឹងថា បើពិនិត្យទៅលើក្របខ័ណ្ឌនៃការតភ្ជាប់ប្រទាក់​ក្រឡាវិញ ផ្លូវខេត្តលេខ៣៧៧ និង៣៧៧A គឺតភ្ជាប់ពីទីប្រជុំជនក្នុងខេត្តក្រចេះ​(ពីរង្វង់​មូល​ព្រាបស) ឆ្ពោះទៅកាន់តំបន់ទេសចរណ៍ធម្មជាតិព្រែកកាំពី និងទេសចរណ៍ប្រវត្តិសាស្រ្ត​វិហារសសរ១០០ និងតភ្ជាប់ទៅកាន់ផ្លូវជាតិលេខ៧ ឆ្ពោះទៅខេត្តស្ទឹងត្រែង រតនគិរី និង​មណ្ឌលគិរី។ ជាមួយគ្នានេះ ឯកឧត្ដមទេសរដ្ឋមន្រ្ដី ស៊ុន ចាន់ថុល ក៏បានថ្លែងអំណរគុណ​យ៉ាង​ជ្រាល​ជ្រៅជូនចំពោះធនាគារពិភពលោក ដែលតែងបានផ្តល់ឥណទានសម្បទាន និង​ជំនួយបច្ចេកទេសផ្សេងៗ សម្រាប់ការអភិវឌ្ឍវិស័យហេដ្ឋារចនាសម្ព័ន្ធរូបវន្ត និងការ​កសាងសមត្ថភាពដល់មន្ត្រីគម្រោង និងការសិក្សាគម្រោងជាដើម ដើម្បីចូលរួមជំរុញការ​អភិវឌ្ឍសង្គម-សេដ្ឋកិច្ចនៅកម្ពុជា ឱ្យកាន់តែល្អប្រសើរ និងរីកចម្រើនបន្ថែមទៀត។

ឯកឧត្ដមទេសរដ្ឋមន្រ្ដីបានបន្ថែមថា ចំពោះគម្រោងលើកកម្រិតគុណភាព និងជួស​ជុលថែទាំកំណាត់ផ្លូវទាំង៣ខ្សែ ដែល​ប្រារព្ធពិធីប្រកាសបើកការដ្ឋាននាពេលនេះ មាន​ប្រវែងសរុប៩៨,៤គីឡូម៉ែត្រ ដែលក្នុង​នោះ​រួមមាន៖ កំណាត់ផ្លូវជាតិលេខ៧៣ ប្រវែង ៤៩,៨១​គីឡូម៉ែត្រ ចាប់ពីផ្លូវបំបែកប្រធាតុ ភូមិប្រធាតុ ឃុំស្រឡប់ ស្រុកត្បូងឃ្មុំ ទៅដល់​ស្ពាន​កំពង់រាំង ឃុំសេដា ស្រុកតំបែរ (ព្រំប្រទល់ខេត្តក្រចេះ) នឹងត្រូវស្តារពង្រីក និងលើក​កម្រិតគុណភាពជាប្រភេទផ្លូវក្រាល​កៅស៊ូAC កម្រាស់ ៥សង់ទីម៉ែត្រ និងក្រាលបេតុង​សរសៃ​ដែកកម្រាស់២០សង់ទីម៉ែត្រ ទទឹង ១០-១៣ម៉ែត្រ (សម្រាប់ផ្លូវ ២គន្លង) និងទទឹង​១៥,៧-១៦ម៉ែត្រ (សម្រាប់ផ្លូវ ៤គន្លង ក្នុងទីប្រជុំជន)។ ចំណែកឯ ផ្លូវខេត្តលេខ៣៧៧ និង​៣៧៧A មានប្រវែងសរុប ៤៨,៦គីឡូម៉ែត្រ ក្នុងនោះ ផ្លូវខេត្តលេខ៣៧៧ មានប្រវែង ៣៥​គីឡូម៉ែត្រ ចាប់ពីរង្វង់មូលព្រាប ស (ក្រុងក្រចេះ) ដល់ស្រុកសំបូរ និងផ្លូវខេត្តលេខ៣៧៧A មានប្រវែង ១៣,៦គីឡូម៉ែត្រ ចាប់ពីផ្សារសណ្តាន់ ឃុំសណ្តាន់ ដល់ភូមិសង្គម ឃុំសណ្តាន់ នៃស្រុកសំបូរ។
សម្រាប់ផ្លូវខេត្តទាំង ២ខ្សែនេះ នឹងត្រូវស្តារពង្រីក និងលើកកម្រិតគុណ​ភាព​ជា​ប្រភេទផ្លូវក្រាលបេតុងកៅស៊ូ(AC) កម្រាស់៥សង់ទីម៉ែត្រ និងក្រាលបេតុងសរសៃ​ដែក កម្រាស់ ២០សង់ទីម៉ែត្រ មានទទឹងចាប់ពី ៧-១១ម៉ែត្រ មាន២គន្លងទៅមក ព្រមទាំង​ការសាងសង់ស្ពានថ្មីចំនួន ៩កន្លែង (នៅលើផ្លូវខេត្តលេខ៣៧៧)។

លោកជំទាវកិត្តិសង្គហបណ្ឌិត ម៉ែន សំអន បានវាយតម្លៃខ្ពស់ចំពោះក្រសួង​សាធារ​ណការ និងដឹកជញ្ជូនក្នុងនាមជាសេនាធិការរបស់រាជរដ្ឋាភិបាល ដែលបានខិតខំប្រឹង​ប្រែង និងយកចិត្តទុកដាក់ខ្ពស់ក្នុងការអភិវឌ្ឍវិស័យហេដ្ឋារចនាសម្ព័ន្ធផ្លូវ-ស្ពាន ស្របតាម​កម្ម​វិធីនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល ដោយសម្រេចបាននូវ​សមិទ្ធ​ផលការងារសំខាន់ៗ ជាច្រើនតាមរយៈការប្រកាសបើកការដ្ឋាននាពេលកន្លងមក។
លោកជំទាវកិត្តិសង្គហបណ្ឌិតបានគូសបញ្ជាក់ពីសារៈសំខាន់នៃសុខសន្តិភាព និងការរីក​ចម្រើនមកដល់ពេលបច្ចុប្បន្ន ក្រោមពលិកម្មដ៏ធំធេង និងការប្រឹងប្រែងអស់ពីកម្លាំងកាយ កម្លាំងចិត្តរបស់សម្ដេចតេជោនាយករដ្ឋមន្រ្តី ដែលបានដឹកនាំប្រទេសជាតិក្នុងបុព្វហេតុ​កសាងនិងការពារមាតុភូមិ សម្រេចជោគជ័យយ៉ាងធំធេងនិងកំពុងនាំកម្ពុជាធ្វើដំណើរ​ឆ្ពោះ​​ទៅមុខដើម្បីសម្រេចគោលដៅជាប្រទេសមានចំណូលមធ្យមកម្រិតខ្ពស់នៅ​ឆ្នាំ​២០៣០ និង​ជាប្រទេសមានចំណូលខ្ពស់នៅឆ្នាំ២០៥០។
លោកជំទាវកិត្តិសង្គហបណ្ឌិតក៏បានកោតសរសើរចំពោះក្រសួងសាធារណការ និង​ដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ និងធនាគារពិភពលោក ដែលបានជួយពន្លឿន​ដល់ការរៀបចំនីតិវិធី ដើម្បីជំរុញគម្រោងនេះឱ្យលេចចេញជារូបរាងឡើង។ លោកជំទាវ​កិត្តិ​​សង្គហបណ្ឌិតបានស្នើឱ្យក្រុមហ៊ុនសាងសង់យកចិត្តទុកដាក់ខ្ពស់ក្នុងការសាងសង់ ស្រប​តាមស្ដង់ដារបច្ចេកទេស និងប្រកបដោយគុណភាព និងបញ្ចៀសការបង្ក​ផលប៉ះ​ពាល់​ដល់បរិស្ថាន ជាពិសេសការបង្ហូរនូវកាកសំណល់ធ្វើឱ្យប៉ះពាល់ដល់ទីជម្រកត្រីផ្សោត​ទន្លេមេគង្គ និងស្នើសុំការយោគយល់ អធ្យាស្រ័យពីសំណាក់បងប្អូនប្រជាពលរដ្ឋ​ដែលរង​ផលប៉ះពាល់ដោយសារគម្រោងអភិវឌ្ឍន៍នេះផងដែរ។
សូមជម្រាបជូនថា កំណាត់ផ្លូវជាតិលេខ៧៣ ត្រូវសាងសង់ដោយក្រុមហ៊ុន Nimmeng-Proco Joint Venture ដោយឡែកផ្លូវខេត្តលេខ៣៧៧ និង៣៧៧A សាងសង់​ដោយ​ក្រុមហ៊ុន Poly Changda Engineering Co., Ltd គ្រោងចំណាយរយៈពេលសាងសង់​ចំនួន​១៨ខែ និងរយៈពេលថែទាំចំនួន៦០ខែដូចគ្នា និងចំណាយថវិកាសាងសង់សរុប​ប្រមាណ៤០លានដុល្លារអាម៉េរិក ក្រោមក្របខណ្ឌឥណទានសម្បទានរបស់ធនាគារ​ពិភព​លោក ក្នុងនោះរួមបញ្ចូលទាំងការងារបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និង​ពន្ធអាករផ្សេងៗផងដែរ៕ដោយ៖ រិទ្ធី, ប្រភព៖ ក្រសួងសាធារណការ

Previous Post Next Post